خطة متكاملة حضرها الجيش اللبناني للتخلص من السلاح غير الشرعي المنتشر بكافة المناطق اللبنانية.
ولما نقول سلاح غير شرعي ما فينا نغض النظر عن سلاح الفصائل الفلسطينية يلي صرلا أكثر من نصف قرن فاتحة عحسابها وبتتحرك داخل وخارج المخيمات بأسلحة الكلاشينكوف، ومدافع الهاون وغيرها.
الدولة اللبنانية واضحة بموقفها ومصممة إنو السلاح يكون حصراً بايد الجيش. وفي جدول زمني كان محطوط من قبل لسحب سلاح الفصائل الفلسطينية من المخيمات، ولكن للأسف ما تنفذ منتصف حزيران متل ما كان مخططلو بسبب كتير عوائق، بالرغم من اعلان الرئيس الفلسطينى محمود عباس استعدادو للتعاون.
هيدا الملف رجع عالساحة اليوم ورح يكون من أول الملفات يلي بتنعرض على السفير الفلسطيني الجديد محمد الاسعد أول ما يبلّش مهامه الاحد المقبل. والقرار راجع للتطبيق متل ما كان متفق عليه. فأهلا بالكل بلبنان الجديد يلي عم يرسمو جيشنا.
